mbose myth

Baroh arliang ki ialam bakla halor ka MBOSE
By Angela RangadKi jingjia ha kine ki sngi bad taiew kiba la dep ki lah pynlynga-pisa ia ngi baroh, bad ka don ruh ka jing suba ba kine kiei kiei baroh, kin sa shu kut kumba kut ka jing iathuh khana ne drama ka ba shu thoh kai tang ban dep. Ynda lah dep ki pakhang shnong, ki picketing, ki korphiw, kaba sah ka long satang ka jing bujli sorkar.
Hapdeng ka jingpyni bor khlemrain jong ka sorkar da kaba pyndonkam ia ka MPDA bad siat tear gas bad um ia ki kynthei, bad ki jingdawa kiba kylla shi kylla jong ki 20 +1 seng, nud ban ong ba ka ishu kaba shisha, katta ka jingdonkam ban pynkhlain ia ka pule puthi ha ka jylla jong ngi kan sa sah kumjuh khlem kano kano ka jing pyn bit.Kane nga nud ban ong namar hapdeng baroh ki ar liang ha kane ka jingiakhih – kita ka sorkar bad ki seng, ka don ka jingkhim jingmut, ka jing thok ia lade da lade bad ka jing bymshim khia ne salia ia ki katto katne ki kyndon kyrpang kiba ngi kum ki nong shong shnong jong ka ri synshar paidbah ngi dei ban burom.
Ka sorkar jong ngi ka la mlien palat ban ialam bakla khnang ia ki paidbah bad ban pyndonkam bakla ia la ka bor haba ki paidbah ki wanlam ia ki ishu bad ki jingangnud hakhmat jong ka. Ha kaba iadei bad ka MBOSE, ha ka jaka ba kan long rangbah bad ban shimkhia ia ka jingangnud jong ki paidbah bad ban trei shitom ban wanlam ia ki jingrai ba pura paka, ka ialeh ia rieh pynban bad ki paidbah. Nyngkong eh ka rai ban buh noh ia u secretary ha Shillong, hynrei haba ka lap ia ka jing khim jong kum kane ka rai ka tyrwa pat sa da ka Komiti ka ban peit halor ki jing duna ka MBOSE bad ka wanrah ruh ia ka ain MPDA ka ba long ka ain ba pyrshah ia ka jing longbriew manbriew. Ka pyndon kam khlem rain ruh iala ka bor ban pynsngap jar ia ki kynthei kiba leit ban iakren bad ka. Nalor katta, ka wanlam syndon sa da ka korphiw.voices of struggle
Baroh kine ki jingleh ki kdew sha ka jing kulmar jingmut jingpyrkhat bad pynpaw ruh ba ka sorkar ka lah jah lynti. Da kaba long kumne, ka sorkar ka plie lad plie lynti pynban ia ki katto katne ki riew shimet bad seng kiba shim kabu ban kyntiew ialade bad ban knieh bor.
Ym dei ban sngew phylla haba ngi ki briew ngim shaniah ia kata ka komiti namar lah bun sien palat ba ngi ju shah pynthame ha kane ka juh ka rukom. Ka sorkar haba ka thaw ia ki komiti ngi lah tip lypa ba ka dei na ka bynta ban pynrung kam ia la ki jong ki nong bud, lane ban shu buhrieh noh ia kino kino ki kam bamsap kam be-ain. Dang shen ngi lah shah pynthaame ha ka juh ka rukom ha kaba ka sorkar ka thaw ia kata ka komiti ban peit halor ki kynrum kynram jong ka fire house concert. Hynrei ka mih aiu na kata ka komiti? Kum ba ioh pdiang na ki kot khubor, ngi tip pyllein pyllein ba ka report jong kata ka komiti ka khlem don ei ei ban ong, ka khlem don ka jing pyllait paidbah ia kata ka report, bad ngi ki paidbah ngi khlem ioh lad satia pan pule ia kata ka report.
Haba ia tang kum kane ka report ruh ka sorkar ka leh buhrieh bad leh sop sop, te ngi lah ban kyrmen aiu kein na kata ka komiti MBOSE? Namar kum ba long haduh mynta, kane ka komiti ka trei sop sop bad kam i pyrwa ia ka jingdon kam ban ia syllok lang bad ki paidbah ha ka jing wad lad wad lynti ban pynkhlain ia ka MBOSE. Ka rukom trei kam kaba sop sop bad kaba ym khein kor ia ki nia bad jingpyrkhat jong ki paidbah ka pyniap ia ka jingia tip lem bad ka pyntroin ia ka jing shaniah jong ki briew. Ka pynlong ruh ia ki briew ban duh jing kyrmen. Hynrei kaba kham kong san ka long ba ka pynlong ia ki briew ban pyndonkam da ki wei pat ki lad ki lynti ban pynioh sngew ia ki jingangnud jong ki, ki lad ki lynti kiba kynthup ia ka jing leh bor. Ka sorkar jong ngi bara bor ka kynran dien ban ia syllok bad iakren bad ki paidbah, haduh ba i kumba ka kloi ban sngap ia tang kum kito ki ba lah ban pyni bor da kaba thang kali, kawang maw bad kiwei kiwei ki kam pynjot pynsniew.
Haba ngi phai pat sha kita ki nong ialeh na ka bynta ka ishu MBOSE, ho-oid dei ban iaroh ia kito ki kynthei kiba shlur bad nud ban ia ai reng bad ki bor ba ha jrong, bad dei ruh ban pynrem jur ia ka sorkar kaba pyndonkam khlemrain ia ka bor ban pynrem bad pynsngap jar ia kine ki kynthei. Hynrei ngi dei ruh ban buh ia katto katne ki jingkylli. Hato, ka jing dawa jong ki ka dei tang shaphang ka jingpyllait patok ia kita ki samla, ne kadei ruh ka jingpyrshah ia ka ain MPDA? Namar kane ka ain ka long shisha katta ka ain ba pyrshah ia ka jing longbriew manbriew, ka ain kaba ia syriem bad ka POTA ka ba la pynduh noh shisyndon ha kiwei pat ki jylla jong kane ka ri, hynrei ka ba dang iai neh hangne bad kaba bun sien la pyndonkam bakla pyrshah ia bun ki samla bad nongshong shnong. Don kata ka jingpyrkhat ba lehse wei ba la lait patok kita ki samla kine ki jingiakhih baroh kin jah noh bad kane ka ain kan dang iai neh. Shuh shuh, lada ka jing dawa jong kine ki kynthei kadei tang kata ka ban thung chairman bad 2 ngut ki secretary kum ba lah buh da ki 20 +1 seng, ka jingiakhih jong ki ka long kaba dang khim. Namar wat lada baroh na ngi ngi ia mynjur ba ka ishu MBOSE ka long shisha kaba ktah ia baroh bad ba la dei por shisha ban pynbeit noh ia ki kynrum kynram ba mih na kane ka ophis lah bun snem mynta, hynrei ka jingialeh jong ngi kan ym poi shaei shaei bad ka long kaba dang sahdien lada ngi bat beit tang ia kata ka jingai jingmut ba tang shu thung Chairman bad ar ngut ki secretary kan pynkut lut ia ki jing tlot jong kane ka ophis trei kam. Haba ka jingangnud jong ngi kadei ba ka rukom trei kam kane ka ophis kan bit kan biang noh ym tang na bynta mynta, hynrei na ka bynta ki phew snem ban wan, ngi dei ban pyniar ia ki jingmut jingpyrkhat jong ngi bad pyrshang ruh ban wad ia ki lad ki lynti kiba pura. Ngim dei ban die tatialade bad ban hun da ki jingaijingmut kiba khim bad ba shipor. Ngi dei ruh ban kynmmaw ba lada ngi shu leh shongshit bad kwah noh ia ki soh ka jingiakhih da kaba pdiang ia ki jubab ki ba shu malu mala tang ban paw ba ngi la dep leh ei ei halor kane ka ishu, ngin sa hap ban jaw ummat biang tang shipor. Ym dei ban shu ialeh shongshit, ioh shu long kum ka jing leh shongshit ba ioh hill state kaba pynmutdur ia ngi ba ia u pud u sam ngi long ban sa ia pynbeit bha pat hadien. Ngi iohi mynta ba katei ka jing leh shongshit kaba pynklet ia ngi ban da trei pura ka pynpoi sha kiwei pat ki kynrum kynram. Namar kata ngi dei ban kylluid jingmut jingpyrkhat bad ngi dei ban long kiba kloi ban ia tai nia pura bad pdiang ia ki jingai jingmut jong baroh khnang ban ioh ka jubab kaba pura. Sa kawei kaba ngi lah ban leh ka long ban husiar ia ka rukom trei kam jong kata ka komiti bad ban dawa ba kadei ban ai report ia ki paidbah khari khari khnang ba ngin ia tip lang ka kam ka lah poi haduh katno. Ka komiti kadei ruh ban plie lad plie lynti ia ki paidbah ban ai ia ki jingmut jingpyrkhat jong ki, bad lehse ka lah ruh ban pynlong ia ka jingiasyllok paidbah (public hearing) ha kaba baroh ki nong shong shnong ka Meghalaya- Khasi, Garo, Jaintia, bad kiwei kiwei ruh ki lah ban ia shim bynta.
Ngi dei ruh ban kynmaw ba ka MBOSE ka dei tang shi bynta jong ka tnad pule puthi, bad ngim dei ban len ba ka pule puthi hi baroh kawei ha kane ka jylla ka long kaba khlem biang haei haei ruh. Te haba kumta, ngi dei ban dawa ba ki jing ai nia bad jingtyrwa jong kata ka komiti ki dei ban long kiba pura haduh katta katta ban kynthup lang ia ki lad ki lynti ban pynkhlain ia ka pule puthi hi baroh kawei. Ngi dei ban kynmaw ruh ba ka ishu MBOSE kam dei satia shaphang kata ka burom jong ka jaitbynriew. Kadei shaphang ka hok. Hynrei kum ba ka long mynta ka jing pynshongshit ka long da ka ba pyndon kam bakla ia kata ka kyntein ‘jaitbynriew’. Ia kito kiba kwah pynshit da kaba kren shi kren tang shaphang kata ka jiadbynriew nga kwah ban kylli kumne…kata ka jaitbynriew ka kynthup iano? Ki nong shong shnong shillong? ki nong shong shnong shillong kiba don ba em ne ki ba bylla sngi? Hato kito ki ba lah duh noh iala ki jaka rep, jaka sah, ki kup shiliang ki sem shiliang ki hap mo hapoh kata ka kyntien jaitbynriew?Ka long ka jingshisha ba 80% ki nong shong shnong ka jylla ki im ki sah ha ki nongkyndong bad bun na ki ki shah thok shah shukor haduh ba kin da duh noh ia la ki jong ki jaka rep, ki rashon, ki dawai, kiba dei ka hok jong ki. Bad ngim lah ban len bad long kaba sngewsih ba kane ka jing shah leh bein ka wan na ki para jaitbynriew hi- kito kiba kham don kham em, kiba bit ba biang ia lade, bad kiba don ha ka bor. Bad mynta sa shi sien ki dei kine hi ki para jaitbynriew kiba pynduh kamai kajih da kaba iakhih na ka bynta ka ishu MBOSE, kaba lehse ym don jingmut ei ei ia kine ki 80% namar kine kim don lad satia wat tang ban pule bad ban pynbit pynbiang ialade ruh. Hato kita kiba kren shaphang kata ka jaitbynriew kin iakhun mo na ka bynta kine ki ba bun ban pynioh ia ka hok jong ki ba kin don lad ban pule? kin iakhun mo bad peit ba ki khynnah skul ki ioh shisha ia ka ja sngi ba kidei ban ioh bad ba kane kan ym shah knieh noh da ka jing ia snoh kti lang ki nongmih khmat, ki ophisar bad ki kontractor? kin ialeh mo na ka bynta ban pynkhlain pynbiang ia ki skul ha ki nongkyndong? kin ia said mo ban wanlam ki ain kum ka ain ban iada na ka jing duh ia ki jaka rep jaka riang (land ceiling act/ land reform), ka ain ban iada ia ki nongrep na ka jing shah beh noh ha ki trai jaka (tenancy security), bad kumta ter ter? Haba shah knieh noh ki hok bad shah nion bein, ka long kaei kaei kaba sniew ba bakla lada leh u para jaidbynriew ne u wei pat.
Ngi dei ban husiar bha ioh kito kiba ioh jing myntoi na kane ka ishu MBOSE ki long tang kito kiba ia knieh bor katba ma ngi ki paidbah madan pat ngim ioh ia u soh ka jingiakhih.Ngi dei ban husiar bad pynthikna ba kane ka jingiakhih kan ym long kum ba long ka jing ia khih ba la long lah katto katne snem mynshuwa kaba ha Don Bosco Square, kaba ialam da ka juh ka seng ba ialam ia ka jingiakhih mynta. Katei ka jingiakhih ka khlem wanlam ei ei ia ngi ki paidbah, bad pynioh bor pynban ia ki riew shimet. Ngi dei ban kynmaw ruh ba ia kane ka ishu MBOSE la ju kyndang da ka juh ka seng ha u snem 1997/1998, hynrei ka khlem da trei pynkut bad shu eih klet noh tang shi por.
Ka jingkylli kaba kongsan ka long, hato ngi kwah ia ka jingpynkylla bad jingpynkhlain ia ka rukom trei kam ka sorkar bad ki tnad sorkar, kum ka tnad pule puthi/ MBOSE, ne ngi kwah ka jing bujli sorkar? Ka long kaei kaei ka ba ma lada ki ishu paidbah ki shah knieh noh bad shah pyndon kam da ki katto katne ki riew shimet ban bujli sorkar man ba ki sngew duh bor. Namar haba ngi bujli ia ka sorkar ngi dei ban peit bniah bha iano ngi buh ha ka jaka jong kito kiba don. Lada ngi thung da u nongtuh thymmai ha ka jaka u nongtuh u ba lah don lypa, kan wanlam jingmyntoi aiu? Ngi dei ban sei madan ia ki jingarsap khnang ba ngin ym shah ialam bakla. Kum mynta ka sien, ngi ki kynthei ngi dei ban kynmaw bad pynpaw pyrthei ba kito ki ba pyndon kam ia ngi kum kita ki nong leit ai khubor, bad kiba pyntur ia ngi shakhmat ha kane ka por, ki dei ki juh ki briew kiba ha ki taiew ba la dep ki pyrshang ban pynsngap jar bad pynrem ia ngi da kaba ong‘ Ka kynthei kam ju dei ban wan balain hakhmat hakhmat ioh kum syllad na kamon na kadiang…’ ‘ym da dei ban ia bun ktien than bad ka kynthei’, bad kiwei kiwei ki jingong (Mawphor, 27 Jylliew 2005). Kum kine ki jait ktien ki long kum ki jingbyrngem ia ki kynthei bad pynpaw ia ka jing ibein ia ki kynthei kum ki bym sngewthuh, ki bym dei ban ia tip lem bad kumta ter ter. Kane ka jing pyrshang ban pynsngap jar ia ngi kam pher na ka rukom pyrshang pynsngap jar ia ngi da ka sorkar ha ka 5 tarik mynta u bnai. Haba don kano kano ka ishu kaba ktah ia ngi baroh, baroh ngi don ka hok ban ia ai nia lem. Lada ka nia jong ngi kam iahap bad ka nia jong kita ki ba ialam ia ki jingiakhih, kam dei ban long ba ngi shah ia ki ban kyntait noh ia ngi, ne pyrshang ban pynsngap jar ia ngi.Bun na ngi ngim juh sngew tynnad ban ioh sngew ia ki jing duna lajong, bad ngi kloi ban kawang maw ia kito kiba kdew ia ki jing duna da kaba khot kyrteng ki laiphew jait.
Hynrei, haba don ka jingieit ia ki parabriew, ngi dei ban kloi ban kdew ia ki jing bym biang. Ym dei ban sngap jar, namar da kaba sngap jar long kum ba btin lynti sha ka jing leit noh iap. Te kum juh, lada ngi kdew sha ki jing duna ki parabriew lajong ruh, kadei ba don ka jingieit bad jingthrang ba ngin dang ia kiew lang shaphrang.
Kum kine ki por shongshit mynta, ngi ki riew madan ba bylla, ba trei shitom, ba ai iala ka met bad mynsiem ban tei ia kane ka ri jong ngi, ngi dei ban husiar bad iada na ka jing shah pyndon kam bakla ha ki briew kiba pyrkhat tang shaphang ka jingiohnong lade shimet. Bun ki ba leit tur sha ka rally ha ka 15 tarik, ki leit lehse da ka jingkyrmen ba kan mih ei ei na ka bynta ki paidbah, hynrei lada kam don ka jinghusiar bha, ka lah ban long ba kine ki jingangnud bad jingthrang ruh kin sa shah knieh noh da ki katto katne ki parabriew kiba lah juh thok juh shukor bad ialam bakla ia ngi dang shen bad ba pyrshang ban dang iai leh kumjuh.

 Angela Rangad is an activist

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

%d bloggers like this: